අන්තිමට Google වැඩේ දුන්නා! දැන් ඔයාගේ පරණ Gmail එක වෙනස් කරගන්න පුළුවන්!
යාලුවනේ, ඔයාලට මතකද ඉස්සර අපි පොඩි කාලේ හදපු පිස්සු විදියේ Gmail ඇඩ්රස්? "coolboy123" වගේ ඒවයින් දැන් ඔෆිස් වැඩ කරන්න ගියාම හරිම ලැජ්ජයි නේද? අන්න ඒ වදෙන් බේරෙන්න අන්තිමට Google නියම විසඳුමක් අරන් ඇවිත් තියෙනවා. වෙනදා වගේ අලුතින් Account එකක් හද හද දඟලන්න ඕන නැහැ, දැන් තියෙන ඇඩ්රස් එකම මාරු කරගන්න පුළුවන්!
දැන්ම Gmail Address එක මාරු කරගන්නේ කොහොමද?
මේ ගැන Android Wedakarayo වෙබ් අඩවිය මුලින්ම වාර්තා කරලා තිබුණා. හැබැයි අපි මේ ගැන තවත් හොයලා බැලුවා. ඇත්තටම 9to5Google එකට අනුව Google සමාගම මේ අලුත් ෆීචර් එක හෙමින් සීරුවේ රෝල් අවුට් කරනවා. ඔයාට කරන්න තියෙන්නේ ඔයාගේ Google Account Settings වලට ගිහින් Personal Info යටතේ තියෙන Email සෙක්ෂන් එක චෙක් කරන එක විතරයි.
මේ වැඩේ තවම හැමෝටම ලැබිලා නැහැ. මුලින්ම හින්දි භාෂාවෙන් තියෙන Google Support පිටුවක තමයි මේ විස්තරේ දාලා තිබුණේ. ඉතින් ඔයාගේ එකෙත් Edit බටන් එක වැටිලා නැත්නම් තව ටික දවසක් ඉවසලා ඉන්න වෙනවා.
මේකේ තියෙන වාසි මොනවද?
- Data මුකුත් නැති වෙන්නේ නැහැ: ඔයාගේ Google Drive එකේ තියෙන ෆයිල්ස්, Google Photos එකේ තියෙන පින්තූර ඔක්කොම ඒ විදියටම තියෙනවා.
- පරණ මේල් ටිකත් එනවා: ඔයා අලුත් ඇඩ්රස් එකක් ගත්තත්, කවුරුහරි පරණ ඇඩ්රස් එකට මේල් එකක් එව්වොත් ඒක ඔයාගේ Gmail ඉන්බොක්ස් එකටම එනවා. ඒ කියන්නේ පරණ ඇඩ්රස් එක "Alias" එකක් විදියට වැඩ කරනවා.
- කැමති එකකින් Sign-in වෙන්න: ඔයාට ඕන නම් පරණ එකෙන්, නැත්නම් අලුත් එකෙන් ලොග් වෙන්න පුළුවන්.
පරිස්සමෙන්! මේ සීමාවන් ගැනත් දැනගන්න
මේකේ පොඩි කන්ඩිෂන් කිහිපයකුත් තියෙනවා. The Verge වගේ ලොකු ටෙක් සයිට් වල මේ ගැන වැඩිපුර විස්තර දාලා තිබුණා. ඔයා එක පාරක් ඇඩ්රස් එක මාරු කළොත් ආයෙත් මාරු කරන්න මාස 12ක් බලන් ඉන්න වෙනවා. ඒ වගේම මුළු ජීවිත කාලෙටම මේ වගේ ඇඩ්රස් මාරු කිරීම් 3ක් විතරයි කරන්න දෙන්නේ. ඉතින් අලුත් නමක් දාද්දි හොඳට හිතලා බලලා දාන්න!
ඔයාගේ Google Calendar එකේ තියෙන පරණ ඉවෙන්ට් වල තවමත් පරණ නම පේන්න ඉඩ තියෙනවා කියලා Google කියනවා. ඒක හින්දා ඒ ගැනත් පොඩ්ඩක් සැලකිලිමත් වෙන්න. මේක ලෝකෙම තියෙන ස්මාර්ට්ෆෝන් යූසර්ස්ලාට ලොකු සහනයක් වෙයි කියලා GSM Arena වගේ සයිට් වලිනුත් අදහස් දක්වලා තිබුණා.
ඉතින් තවත් මොකටද බලන් ඉන්නේ? ඉක්මනට ගිහින් චෙක් කරලා බලන්න ඔයාටත් මේ චාන්ස් එක ලැබිලාද කියලා. ලැබිලා නම් මාරු කරලා අපිටත් කියන්න. මේ වගේ අලුත්ම ටෙක් නිවුස් දැනගන්න දිගටම OneReddak එක්ක ඉන්න!